Улонтӥ - спортэн
12.10.2017
Спорт
В Штанигуртском ДК «Искра» чествовали лучших спортсменов – представителей, тренеров сборной команды МО «Глазовский район», финалистов республиканских сельских игр, спартакиады инвалидного спорта, летнего фестиваля ВФСК ГТО, спартакиады пенсионеров.
Ӟеч сяме пыӵамын ини котькуд тулыс но сӥзьыл ёросысь спортсменъёсты сӥлы карон. Гужем сезонэз пытсаса, Штанигуртысь лулчеберетъя юртын толон ортчиз спортъя праздник.
Гужем сезон апрельысен сентябрёзь кыстӥське. Нош ик со вал узыр уно вормонъёсын но шумпоттӥсь учыръёсын, тунсыко ужрадъёсын. Ёросысь спортъя ёзэтлэн бурд улаз туэысен пыртэмын на ӧлексыослэн спортсыя но пенсионеръёслэн спартакиадаоссы. Озьы ужрад огинэ люказ гурт шудонъёсы, спартакиадаосы, ГТОя фестивале пыриськись спортсменъёсты но тренеръёсты.
- Ог 70 адями пусйимы-данъямы, ваньзы соос спортъя бадӟым ужрадъёслэн финал этапазы нюръяськемъёс. Жаляса верано, студентъёсмы ӧй вал пӧламы, лыктыны ӧз быгатэ, но соослэн нимъёссы одно ик чузъяськизы. Данъяськиськомы Ижын дышетскись Пониноысь Настя Урсеговаен, Парзиысь Алексей Чирковен – соослы бадӟым осконмы, - вера ёросысь спорт удыс понна кыл кутӥсь Александр Столбов.
Элькун радын тодмо пенсионеръёсмылэн спортын быгатонъёссы. Тани Лекшурысь Николай Баженов спартакиада дыръя 1-тӥ инты басьтӥз, нокин ӧз быгаты бызьылӥсьмес азьпалтыны. Солэн вормонэз – ёрослэн данэз. Тренер ужзэ но валаса нуэ, котькинлы но адӟем карымон луэ Пониноысь Валентина Кунаева. Глазов ёросэз кӧня арзэ ни данъя Адамысь Пётр Арафаилов!
Данъяськымон спортсменъёссы ӧлоексыос пӧлын но. Тугбулатовоысь Артур Лялин тол но, гужем но ӵошатсконъёсын – вормисьёс радын. Со элькун спартакиадаын но ушъямон вожвылъяське. Тужгес но егитэз командаын - Качкашурысь Кирилл Третьяков, спортлы бадӟым мылкыдо, вань солы, кинлэсь адӟем карыны.
- Солэн вормонъёсыз – азьпалан. Та пияшез зэмос спортсмен кареммы потэ, паурлифтингын ассэ возьматыны быгатоз, - шуэ Александр Сергеевич.
Егит но арлыдо спортсменъёсын артэ празднике ӧтемын пинал спортсменъёс. 116 пӧлысь, кудъёсыз ёрос радысь ӵошатсконъёсын вожвылъясько, быръемын 8 кужмоосыз но устоосыз. Соос – Качкашур, Кожиль но Адам школаын дышетскисьёс, элькун ӵошатсконъёсысь вормонъёсынызы данъяськыны быгатӥсьёс. Тани пусъёмы Тимофей Савиновез – Адамысь спортъя школалэн кизилиез. 14 аресъем пияш ГТОя элькун фестивальын 2-тӥ инты басьтэ!
Элькун гурт шудонъёсы туэ нырысьсэ пыриськиз Куреггуртысь Диана Касаткина, нош сомында спортсменъёс пӧлын ӧз сётскы – ки кужыменыз 5-тӥ интые потӥз. Арысь аре вылӥ вормонъёс возьматэ Дубовцевъёслэн спортивной семьязы. Нырысь бадӟым нылынызы вожвылъяськизы, со бере эстафетаез кыкетӥ нылзы кутӥз. Вань ни кинлы азьланьтыны – пизы будэ. Ёросын данъясько таӵе семьяосын!
Лариса Гурьянова. Туспуктэмъёсыз авторлэн.
