19.12.2017

Спорт

Шаерамы старт сётэмын ини элькун тол гурт шудонъёслы. Финалэ потон понна нюръясько спортлэн шудон ёзэтъёсызъя ӵошатскись командаос. Таяз шутэтскон нуналъёсы Дэбесын пумиськозы кечато пул сьӧрын вожвылъяськисьёс. Глазов ёрослэсь данзэ утёзы Лия Вершинина, Дмитрий Родионов но Матвей Ядрышников. Таӵе командаен соос нырысьсэ пыриськозы. Гурт шудонъёсын пӧлысьтызы тужгес но кема шудэ ини Дмитрий.

- Песятае яратылӥз шахматэн шудыны, со ик монэ дышетӥз. Вордски мон Кезын, но семьямы выжиз улыны Як-Бодья ёросэ, Селычкае. Отын 2-тӥ классысен ини кутски шахматъя секцие ветлыны, соин кивалтӥз ёросысь одӥгез кужмоез шахматист Николай Перевощиков. Солы луыса, вылӥ вормонъёсозь ӝутскыны быгатӥ: ёросын 5 пол чемпион нимез басьтылӥ. Аслам огъёзоосы лябесьгес вал, соин бадӟымъёсыныз шудылӥ. Быгатонлыкъёсме азинтыны луонлыкъёс вал, университетын дышетскыкум но. 2010-тӥ аре мон вуи Глазове, ужасько Глазовысь архитектурая но лэсьтӥськонъя кивалтонниын, валтӥсь специалист-эксперт луыса. Соку ик кутски Глазов ёрос понна гурт шудонъёсын вожвылъяськыны.

- Элькун радын учконо ке, кыӵе интыын сылэ командады?

- Арысь аре азямы сыӵе ужпумъёс пуктӥськомы: нырысь ик - 10-эз кужмоосыз пӧлы шедьыны, эшшо ӟечгес - финалэ потыны. Ӝутскыны пӧрме, кылем аре 9-тӥ инты басьтӥмы ни, но финалэ потыны ӧз удалты на. Туэ 5-ез кужмоосыз радэ потыны тыршомы. Вожвылъяськисьёс золэсь, уката но егитъёс. Тани пусъёмы уваосты, можгаосты, красногорьеосты – юн быгатыса шудо, спортъя мастеръёссы вань. Красногорье та удысын адӟем карымон луэ – кыӵе кужмо кизилиосты будэтэ! Шахматэн шудон отын - ӟеч сямын.

- Удмуртиын «Шахматы в школах» выль проект улонэ пыӵалоз, со улсын 25 школаосын 1-тӥ классын дышетскисьёс понна нимысьтыз урокъёс радъяськозы. Шумпотымон, проектэ шедемын Красногорск ёрос но, Як-Бодья ёросэд но. Тон кызьы та проект шоры учкиськод: кулэ-а школаын шахмат?

- Одно ик. Та ужез туж кулэен но ӟечен лыдъясько, ваньмаз школаосы со мед вуоз вал. Мон ачим но быгатонлыкъёсме школаын будэтӥ-юнматӥ ук. Пиме 3 арескысеныз шахматъёсын тодматӥ. Али солы 4 арес, тыро-пыдо шудыны чиданэз уггес тырмы на. Малпасько Матвей Ядрышниковлы сётыны, со карысь ДДК-ын секция нуэ. Отӥяз пичи нылме но шахматлы лӧпкыто.

- Нош ачид спортъя мастер луон сярысь малпась- киськод-а?

- Школаын но университетын дышетскыкум, нуналлы быдэ шахматэн шудылӥ. Али озьы уг ни пӧрмы, тросгес дыр висъяське ужлы но семьялы. Пенсие потӥ ке, оло, та малпанэз быдэстыны быгато.

- Вань-а шахмат дуннеын сыӵе адямиос, кудъёсыз тон понна адӟем карымон луо?

- Пинал дыръям со вал Александр Алёхин – дуннеысь одӥгез кужмоез шудӥсь, "Король шахмат" сое нимазы, шахматэн шудонъя со вал 4-тӥез дуннеысь чемпион. Нош тодӥ мон со сярысь книгаысь, кудзэ муми кузьмаз вал, ёросын чемпион луэме бере. Алёхин туж юн теоретик вылэм, шуглэсь но шуг комбинациосыныз висъяськылэм. Али мон матысьгес тодматскыны вырисько Каспаровлэн теориеныз, таиз шудӥсьмы луэ 13-тӥез дуннеысь чемпион. Шахматэн шудон али сыӵе ни: макем ӟеч тон тодӥськод теориез, сокем бадӟым луонлыкед вормыны. Шахматлэн азинсконэзлы паськыт сюрес усьтӥз на интернет. Вань виртуальной секциос, кудъёсаз ачим но шудыны тыршисько, быгатонме ӝутон-юнматон понна.

- Бадӟым тау тыныд, Дмитрий. Малпанъёсыд мед быдэсмозы!

Лариса Гурьянова.

Глазов ёрос.