07.02.2020

Спорт

57-тӥзэ ортчизы «Удмурт дунне» газетлэн призъёсыз понна куасэн ӵошатсконъёс. Таяз аре соос радъяськизы Красногорск черкогуртын. 
Стартъёсы потӥзы пиналэз но, мӧйыэз но – ваньмыз, кин яратэ куасэн бызьылонъёсты, кин тырше тол куспын тужгес но тросгес вожвылъяськонъёсы пыриськыны. 
Йылпумъянъёс возьмато: уйпал ёросъёсысь куасчиос – кужмоосыз радын. Тани, шуом, нош вормисе потӥзы Ярысь Юлия Рудина, Юкаменскысь Николай Злобин, Красногорскысь Сергей Тарасов. Егитъёс но туж ушъямон бызьылӥллям: данъян тубат вылэ ӝутскизы Балезино, Юкаменск но Красногорск ёросъёсысь спортсменъёс. Командаослэн огъя зачётсыя чемпион луизы пичипургаос, 2-тӥ но 3-тӥ интыосын – юкаменскъёс но красногорскъёс. 

Шумпотымон ивор вуиз Красногорскысь Глазов ёросэ. Тодмо полиатлонист Володя Дзюин кузпалыныз но нылыныз, семьяос куспын эстафетаын вожвылъяськыса, вормисе потӥзы. Дзюинъёс понна та ӵошатсконъёс кужымзэс мертанэн луизы, уга азьпалан соосты витё элькун гурт шудонъёсын вожвылъяськонъёс. 
- «Удмурт дуннелэн» призъёсыз понна ӵошатсконъёсы валля аре эшшо семьяенымы пыриськыны кенешимы, но ӧз пӧрмы вал. Кузпалыным соку нимамы бызьылӥмы, кыкнамы ик призёръёс радэ потӥмы. Туэ нылмес но бордамы кутӥмы. Умой, ӵошатскись пиналъёс арессыя кыклы люкемын шуыса. Анямы 3-тӥ классын дышетске, со пичиосыз пӧлы пыриз, - шуэ Володя. 

Нош гурт шудонъёсын сыӵеез ӧвӧл, соин Анялы бадӟымъёсыныз оградын вожвылъяськоно луэ. Но со уг кышка, дышем ини. 
- Ӵошатскыны со яратэ, соос ӝог ортчо ук, нош тренироваться кема но ӵем кариськоно луэ – таизлы пумен-пумен дыше ай, - валэктэ бубиз. 
Куас сюресъёс вылэ Дзюинъёс потаны кутскизы, лымы усем бере ик. Нуналлы быдэ кадь нискыласьком, шуо. Тӥни озьы – кужымзы но, семьязы но юнмало. 
Лариса ГУРЯНОВА, газета "Иднакар"